קטע קריאה יומי

דניאל ד

(א) אֲנִי נְבוּכַדְנֶצַּר, שָׁלֵו הָיִיתִי בְּבֵיתִי, וְרַעֲנָן בְּהֵיכָלִי. (ב) חֲלוֹם רָאִיתִי וְיַפְחִידֵנִי, וְהִרְהוּרִים עַל מִשְׁכָּבִי, וְחֶזְיוֹנוֹת רֹאשִׁי יְבַהֲלוּנִי. (ג) וּמִמֶּנִּי הוּשַׂם צַו: לְהָבִיא לְפָנַי אֶת כָּל חַכְמֵי בָבֶל, אֲשֶׁר פִּתְרוֹן הַחֲלוֹם יוֹדִיעוּנִי. (ד) אָז יָבֹאוּ הַחַרְטֻמִּים הָאַשָּׁפִים הַכַּשְׂדִּים וְהַקּוֹסְמִים, וְאֶת הַחֲלוֹם אֲנִי אוֹמֵר לִפְנֵיהֶם, וּפִתְרוֹנוֹ אֵין מוֹדִיעִים לִי. (ה) וְעַד  לָאַחֲרוֹנָה בָּא לְפָנַי דָּנִיֵּאל, אֲשֶׁר שְׁמוֹ בֵּלְטְשַׁאצַּר כְּשֵׁם אֱלֹהַי, וַאֲשֶׁר רוּחַ אֱלֹהִים קְדוֹשִׁים בּוֹ, וְאֶת הַחֲלוֹם לְפָנָיו אָמַרְתִּי:

(ו) בֵּלְטְשַׁאצַּר שַׂר הַחַרְטֻמִּים, אֲשֶׁר אֲנִי יָדַעְתִּי כִּי רוּחַ אֱלֹהִים קְדוֹשִׁים בָּךְ, וְכָל רָז אֵינוֹ מוֹנֵעַ אוֹתְךָ, חֶזְיוֹנוֹת חֲלוֹמִי אֲשֶׁר רָאִיתִי וּפִתְרוֹנוֹ אֱמֹר!
(ז) וְחֶזְיוֹנוֹת רֹאשִׁי עַל מִשְׁכָּבִי: רוֹאֶה הָיִיתִי וְהִנֵּה אִילָן בְּתוֹךְ הָאָרֶץ, וְגָבְהוֹ רָב. (ח) גָּדַל הָאִילָן וְחָזַק, וְגָבְהוֹ יַגִּיעַ לַשָּׁמַיִם, וּמַרְאֵהוּ לְסוֹף כָּל הָאָרֶץ. (ט) עָפְיוֹ יָפֶה וּפִרְיוֹ רַב, וּמָזוֹן לַכֹּל בּוֹ. תַּחְתָּיו תִּצְלַל חַיַּת  הַשָּׂדֶה, וּבַעֲנָפָיו יֵשְׁבוּ צִפֳּרֵי הַשָּׁמִים, וּמִמֶּנּוּ יִזּוֹן כָּל בָּשָׂר.
(י) רוֹאֶה הָיִיתִי בְּחֶזְיוֹנוֹת רֹאשִׁי עַל מִשְׁכָּבִי, וְהִנֵּה מַלְאָךְ וְקָדוֹשׁ מִשָּׁמַיִם יוֹרֵד. (יא) קוֹרֵא בְכֹחַ וְכֵן אוֹמֵר: גֹּזוּ הָאִילָן וְקַצְּצוּ עֲנָפָיו! הַשִּׁירוּ עָפְיוֹ וּפַזְּרוּ פִרְיוֹ! תָּנוּד הַחַיָּה מִתַּחְתָּיו וְהַצִּפֳּרִים מֵעֲנָפָיו! (יב) אַךְ  עִקַּר שָׁרָשָׁיו בָּאָרֶץ הַנִּיחוּ, וּבֶאֱסוּר שֶׁל בַּרְזֶל וּנְחֹשֶׁת בְּדֶשֶׁא הַשָּׂדֶה. וּבְטַל הַשָּׁמַיִם יִרְטַב, וְעִם הַחַיָּה חֶלְקוֹ בְּעֵשֶׂב הָאָרֶץ. (יג) לִבּוֹ מֵאֱנוֹשׁ יְשַׁנּוּ וְלֵב חַיָּה יִנָּתֵן לוֹ, וְשִׁבְעָה מוֹעֲדִים יַחְלְפוּ עָלָיו. (יד) בִּגְזֵרַת  מַלְאָכִים הַדָּבָר, וּמַאֲמַר קְדוֹשִׁים הַמִּשְׁאָלָה. לְמַעַן אֲשֶׁר יֵדְעוּ הַחַיִּים כִּי שׁוֹלֵט הָעֶלְיוֹן בְּמַלְכוּת אֱנוֹשׁ, וּלְמִי אֲשֶׁר יִּרְצֶה יִתְּנֶנָּה, וּשְׁפַל אֲנָשִׁים יָקִים עָלֶיהָ.
(טו) זֶה הַחֲלוֹם רָאִיתִי, אֲנִי הַמֶּלֶךְ נְבוּכַדְנֶצַּר. וְאַתָּה בֵּלְטְשַׁאצַּר פִּתְרוֹנוֹ אֱמֹר! מִפְּנֵי שֶׁכָּל חַכְמֵי מַלְכוּתִי אֵינָם יְכוֹלִים לְהוֹדִיעֵנִי הַפִּתְרוֹן, וְאַתָּה יָכוֹל, כִּי רוּחַ אֱלֹהִים קְדוֹשִׁים בָּךְ!

(טז) אָז דָּנִיֵּאל אֲשֶׁר שְׁמוֹ בֵּלְטְשַׁאצַּר, הִשְׁתּוֹמֵם כְּשָׁעָה אַחַת, וְרַעְיוֹנָיו יְבַהֲלוּהוּ. וַיַּעַן הַמֶּלֶךְ וַיֹּאמַר: בֵּלְטְשַׁאצַּר, הַחֲלוֹם וּפִתְרוֹנוֹ אַל יְבַהֲלֶךָ! וַיַּעַן בֵּלְטְשַׁאצַּר וַיֹּאמַר: אֲדוֹנִי! הַחֲלוֹם לְשׂוֹנְאֶיךָ, וּפִתְרוֹנוֹ לְצָרֶיךָ!

(יז) הָאִילָן אֲשֶׁר רָאִיתָ אֲשֶׁר גָּדַל וְחָזַק, וְגָבְהוֹ יַגִּיעַ לַשָּׁמַיִם, וּמַרְאֵהוּ לְכָל הָאָרֶץ, (יח) וְעָפְיוֹ יָפֶה וּפִרְיוֹ רַב, וּמָזוֹן לַכֹּל בּוֹ, תַּחְתָּיו תֵּשֵׁב חַיַּת הַשָּׂדֶה, וּבַעֲנָפָיו תִּשְׁכֹּנָּה צִפֳּרֵי הַשָּׁמַיִם, (יט) אַתָּה הוּא הַמֶּלֶךְ  אֲשֶׁר גָּדַלְתָּ וְחָזַקְתָּ! וּגְדֻלָּתְךָ גָּדְלָה וְהִגִּיעָה לַשָּׁמַיִם, וְשִׁלְטוֹנְךָ לְסוֹף הָאָרֶץ.
(כ) וַאֲשֶׁר רָאָה הַמֶּלֶךְ מַלְאָךְ וְקָדוֹשׁ יוֹרֵד מִן הַשָּׁמַיִם, וַיֹּאמֶר גֹּזוּ הָאִילָן וְהַשְׁחִיתוּהוּ, אוּלָם עִקַּר שָׁרָשָׁיו בָּאָרֶץ הַנִּיחוּ, וּבֶאֱסוּר שֶׁל בַּרְזֶל וּנְחֹשֶׁת בְּדֶשֶׁא הַשָּׂדֶה, וּבְטַל הַשָּׁמַיִם יִרְטַב, וְעִם חַיַּת הַשָּׂדֶה חֶלְקוֹ, עַד אֲשֶׁר שִׁבְעָה מוֹעֲדִים יַחְלְפוּ עָלָיו. (כא) זֶה הַפִּתְרוֹן הַמֶּלֶךְ, וּגְזֵרַת עֶלְיוֹן הִיא, שֶׁהִגִּיעָה אֶל אֲדוֹנִי הַמֶּלֶךְ: (כב) וְאוֹתְךָ מְגָרְשִׁים מֵאֱנוֹשׁ, וְעִם חַיַּת הַשָּׂדֶה יִהְיֶה מוֹשָׁבֶךָ; וְעֵשֶׂב כִּשְׁוָרִים אוֹתְךָ יַאֲכִילוּ, וּמִטַּל  הַשָּׁמַיִם אוֹתְךָ יַרְטִיבוּ, וְשִׁבְעָה מוֹעֲדִים יַחְלְפוּ עָלֶיךָ. עַד אֲשֶׁר תֵּדַע כִּי שׁוֹלֵט עֶלְיוֹן בְּמַלְכוּת אֱנוֹשׁ, וּלְמִי אֲשֶׁר יִּרְצֶה יִתְּנֶנָּה!
(כג) וַאֲשֶׁר אָמְרוּ לְהַנִּיחַ עִקַּר שָׁרָשָׁיו שֶׁל הָאִילָן: הַמַּלְכוּת לְךָ קַיֶּמֶת, מֵאֲשֶׁר תֵּדַע כִּי שׁוֹלְטִים הַשָּׁמַיִם.(כד) לָכֵן הַמֶּלֶךְ עֲצָתִי תִּיטַב עָלֶיךָ: וַחֲטָאֶיךָ בִּצְדָקָה פְדֵה, וַעֲוֹנוֹתֶיךָ בְּחֹן עֲנִיִּים, אוּלַי תִּהְיֶה אַרְכָּה לְשַׁלְוָתֶךָ.

(כה) הַכֹּל הִגִּיעַ אֶל נְבוּכַדְנֶצַּר הַמֶּלֶךְ.

{פ} (כו) לְקֵץ יְרָחִים שְׁנֵים עָשָׂר, עַל הֵיכַל הַמַּלְכוּת שֶׁל בָּבֶל מְהַלֵּךְ הָיָה. (כז) וַיַּעַן הַמֶּלֶךְ וַיֹּאמַר: הֲלֹא זוֹ הִיא  בָבֶל הַגְּדוֹלָה, אֲשֶׁר אֲנִי בְנִיתִיהָ לְבֵית מַלְכוּת, בְּתֹקֶף חָסְנִי וְלִכְבוֹד הֲדָרִי!

(כח) עוֹד הַדָּבָר בְּפִי הַמֶּלֶךְ, קוֹל מִן הַשָּׁמַיִם נָפַל: לְךָ אוֹמְרִים נְבוּכַדְנֶצַּר הַמֶּלֶךְ, הַמַּלְכוּת עָבְרָה מִמֶּךָּ! (כט)וּמֵאֱנוֹשׁ אוֹתְךָ מְגָרְשִׁים, וְעִם חַיַּת הַשָּׂדֶה מוֹשָׁבֶךָ! עֵשֶׂב כִּשְׁוָרִים אוֹתְךָ יַאֲכִילוּ! וְשִׁבְעָה מוֹעֲדִים יַחְלְפוּ עָלֶיךָ עַד אֲשֶׁר תֵּדַע: כִּי שׁוֹלֵט הָעֶלְיוֹן בְּמַלְכוּת אֱנוֹשׁ, וּלְמִי שֶׁיִּרְצֶה יִתְּנֶנָּה! (ל) בָּהּ בַּשָּׁעָה כָּלָה הַדָּבָר עַל נְבוּכַדְנֶצַּר:  וּמֵאֱנוֹשׁ גֹּרַשׁ, וְעֵשֶׂב כִּשְׁוָרִים יֹאכַל, וּמִטַּל הַשָּׁמַיִם גּוּפוֹ יִרְטַב, עַד אֲשֶׁר גָּדַל שְׁעָרוֹ כִּנְשָׁרִים וְצִפָּרְנָיו כְּצִפֳּרִים.

(לא) וּלְקֵץ הַיָּמִים, אֲנִי נְבוּכַדְנֶצַּר נָשָׂאתִי עֵינַי לַשָּׁמַיִם, וְדַעְתִּי עָלַי תָּשׁוּב. וְאֶת הָעֶלְיוֹן בֵּרַכְתִּי, וְאֶת חֵי הָעוֹלָם שִׁבַּחְתִּי וּפֵאַרְתִּי: אֲשֶׁר שִׁלְטוֹנוֹ שִׁלְטוֹן עוֹלָם, וּמַלְכוּתוֹ עִם דּוֹר וָדוֹר! (לב) וְכָל יוֹשְׁבֵי הָאָרֶץ כְּאַיִן חֲשׁוּבִים,  וְכִרְצוֹנוֹ עוֹשֶׂה בִּצְבָא הַשָּׁמַיִם וְיוֹשְׁבֵי הָאָרֶץ. וְאֵין אֲשֶׁר יְמַחֶה בְיָדוֹ וְיֹאמַר לוֹ: מָה תַּעֲשֶׂה?

(לג) בּוֹ בַזְּמַן דַּעְתִּי תָּשׁוּב עָלַי, וְלִכְבוֹד מַלְכוּתִי הֲדָרִי וְזִיוִי יָשׁוּב אֵלַי, וְאוֹתִי יְבַקְּשׁוּ יוֹעֲצַי וְשָׂרַי, וְעַל מַלְכוּתִי הוּכַנְתִּי, וּגְדֻלָּה יְתֵרָה נוֹסְפָה לִי. (לד) כָּעֵת אֲנִי נְבוּכַדְנֶצַּר מְשַׁבֵּחַ וּמְרוֹמֵם וּמְפָאֵר אֶת מֶלֶךְ הַשָּׁמַיִם, אֲשֶׁר כָּל  מַעֲשָׂיו אֱמֶת וְאָרְחוֹתָיו מִשְׁפָּט, וַאֲשֶׁר מְהַלְּכִים בְּגַאֲוָה יָכוֹל לְהַשְׁפִּיל.

דניאל ה

(א) בֵּלְשַׁאצַּר הַמֶּלֶךְ עָשָׂה מִשְׁתֶּה גָדוֹל לְאֶלֶף שָׂרָיו, וּמוּל הָאֶלֶף יַיִן שָׁתָה. (ב) וַיֹּאמֶר בֵּלְשַׁאצַּר בַּעֲצַת הַיַּיִן,  לְהָבִיא אֶת כְלֵי הַזָּהָב וְהַכֶּסֶף אֲשֶׁר הוֹצִיא נְבוּכַדְנֶצַּר אָבִיו מִן הַהֵיכָל אֲשֶׁר בִּירוּשָׁלַיִם, וְיִשְׁתּוּ בָהֶם הַמֶּלֶךְ וְשָׂרָיו, נָשָׁיו וּפִילַגְשָׁיו. (ג) אָז הֵבִיאוּ כְּלֵי הַזָּהָב אֲשֶׁר הוֹצִיאוּ מִן הַהֵיכָל שֶׁל בֵּית הָאֱלֹהִים אֲשֶׁר בִּירוּשָׁלַיִם, וַיִּשְׁתּוּ בָהֶם הַמֶּלֶךְ וְשָׂרָיו, נָשָׁיו וּפִילַגְשָׁיו. (ד) וַיִּשְׁתּוּ אֶת הַיַּיִן, וַיְשַׁבְּחוּ אֶת אֱלֹהֵי הַזָּהָב וְהַכֶּסֶף, הַנְּחֹשֶׁת הַבַּרְזֶל  הָעֵץ וְהָאֶבֶן.

(ה) בָּהּ בַּשָּׁעָה יָצְאוּ אֶצְבְּעוֹת שֶׁל יַד אָדָם, וַיִּכְתְּבוּ מוּל הַמְּנוֹרָה עַל הַשִּׂיד שֶׁל כֹּתֶל הַהֵיכָל שֶׁל הַמֶּלֶךְ, וַיַּרְא הַמֶּלֶךְ אֶת פַּס הַיָּד אֲשֶׁר כּוֹתֶבֶת. (ו) אָז הַמֶּלֶךְ זִיווֹ נִשְׁתַּנֶּה לוֹ וְרַעְיוֹנָיו יְבַהֲלוּהוּ, וְקִשְׁרֵי חֲלָצָיו נִתָּרוּ, וּבִרְכָּיו זוֹ לְזוֹ נָקְשׁוּ. (ז) וַיִּקְרָא הַמֶּלֶךְ בְּכֹחַ לְהָבִיא אֶת הָאַשָּׁפִים הַכַּשְׂדִּים וְהַקּוֹסְמִים. וַיַּעַן הַמֶּלֶךְ וַיֹּאמֶר לְחַכְמֵי בָבֶל: אֲשֶׁר  כָּל אִישׁ אֲשֶׁר יִקְרָא אֶת הַכְּתָב הַזֶּה וּפִתְרוֹנוֹ יוֹדִיעֵנִי, אַרְגָּמָן יִלְבַּשׁ וּרְבִיד שֶׁל זָהָב עַל צַוָּארוֹ, וּשְׁלִישִׁי בַּמַּלְכוּת יְשְׁלָט.

{ס} (ח) אָז בָּאוּ כָּל חַכְמֵי הַמֶּלֶךְ, וְלֹא יָכְלוּ אֶת הַכְּתָב לִקְרֹא, וְאֶת פִּתְרוֹנוֹ לְהוֹדִיעַ לַמֶּלֶךְ. (ט) אָז נִבְהַל הַמֶּלֶךְ בֵּלְשַׁאצַּר מְאֹד, וְזִיווֹ נִשְׁתַּנָּה לוֹ, וְשָׂרָיו נְבוֹכִים. (י) הַמַּלְכָּה בַּעֲבוּר דִּבְרֵי הַמֶּלֶךְ וְשָׂרָיו בָּאָה אֶל בֵּית הַמִּשְׁתֶּה, וַתַּעַן הַמַּלְכָּה וַתֹּאמֶר: הַמֶּלֶךְ לְעוֹלָמִים חֱיֵה! אַל יְבַהֲלוּךָ רַעְיוֹנֶיךָ וְזֶיוְךָ אַל יִשְׁתַּנֶּה. (יא) יֵשׁ אִישׁ בְּמַלְכוּתֶךָ אֲשֶׁר  רוּחַ אֱלֹהִים קְדוֹשִׁים בּוֹ, וּבִימֵי אָבִיךָ הֶאָרָה וְהַשְׂכֵּל וְחָכְמָה כְּחָכְמַת אֱלֹהִים נִמְצָאָה בוֹ. וְהַמֶּלֶךְ נְבוּכַדְנֶצַּר אָבִיךָ, לְרַב חַרְטֻמִּים אַשָּׁפִים כַּשְׂדִּים קוֹסְמִים הֱקִימוֹ אָבִיךָ הַמֶּלֶךְ. (יב) יַעַן אֲשֶׁר רוּחַ יְתֵרָה, וּמַדָּע וְהַשְׂכֵּל לִפְתֹּר  חֲלוֹמוֹת לְהַגָּדַת חִידוֹת וּלְהַתִּיר קְשָׁרִים, נִמְצְאָה בוֹ בְּדָנִיֵּאל, אֲשֶׁר הַמֶּלֶךְ שָׂם שְׁמוֹ בֵּלְטְשַׁאצַּר, עַתָּה דָּנִיֵּאל יִקָּרֵא וְאֶת הַפִּתְרוֹן יַגִּיד.

{פ} (יג) אָז דָּנִיֵּאל הוּבָא לִפְנֵי הַמֶּלֶךְ, וַיַּעַן הַמֶּלֶךְ וַיֹּאמֶר לְדָנִיֵּאל: אַתָּה הוּא דָּנִיֵּאל אֲשֶׁר מִבְּנֵי גָּלוּת יְהוּדָה, אֲשֶׁר הֵבִיא הַמֶּלֶךְ אָבִי מִן יְהוּדָה? (יד) וְשָׁמַעְתִּי עָלֶיךָ כִּי רוּחַ אֱלֹהִים בָּךְ, וְהֶאָרָה וְהַשְׂכֵּל וְחָכְמָה יְתֵרָה נִמְצְאָה בָךְ.(טו) וְכָעֵת הוּבְאוּ לְפָנַי הַחֲכָמִים הָאַשָּׁפִים, אֲשֶׁר הַכְּתָב הַזֶּה יִקְרְאוּ וּפִשְׁרוֹ לְהוֹדִיעֵנִי, וְאֵינָם יְכוֹלִים פֵּשֶׁר דָּבָר לְהַגִּיד. (טז) וַאֲנִי שָׁמַעְתִּי עָלֶיךָ כִּי תוּכַל פִּתְרוֹנִים לִפְתֹּר וּקְשָׁרִים לְהַתִּיר, עַתָּה אִם תּוּכַל אֶת הַכְּתָב לִקְרֹא  וּפִתְרוֹנוֹ לְהוֹדִיעֵנִי, אַרְגָּמָן תִּלְבַּשׁ וּרְבִיד שֶׁל זָהָב עַל צַוָּארֶךָ, וּשְׁלִישִׁי בַּמַּלְכוּת תִּשְׁלֹט.

{פ} (יז) אָז עָנָה דָּנִיֵּאל וַיֹּאמֶר לִפְנֵי הַמֶּלֶךְ: מַתְּנוֹתֶיךָ לְךָ תִּהְיֶינָה וּמַשְׂאֵתְךָ לְאַחֵר תֵּן, אַךְ אֶת הַכְּתָב אֶקְרָא לַמֶּלֶךְ  וְאֶת הַפִּתְרוֹן אוֹדִיעֶנּוּ:

(יח) אַתָּה הַמֶּלֶךְ, הָאֵל הָעֶלְיוֹן נָתַן מַלְכוּת וּגְדֻלָּה וִיקָר וְהָדָר לִנְבֻכַדְנֶצַּר אָבִיךָ. (יט) וּמִן הַגְּדֻלָּה אֲשֶׁר נָתַן לוֹ, כָּל הָעַמִּים הָאֻמּוֹת וְהַלְּשׁוֹנוֹת הָיוּ חֲרֵדִים וִירֵאִים מִפָּנָיו. אֲשֶׁר הָיָה חָפֵץ הָיָה מֵמִית, וַאֲשֶׁר הָיָה חָפֵץ הָיָה מְחַיֶּה, וַאֲשֶׁר הָיָה חָפֵץ הָיָה מֵרִים, וַאֲשֶׁר הָיָה חָפֵץ הָיָה מַשְׁפִּיל. (כ) וְכַאֲשֶׁר רָם לְבָבוֹ וְרוּחוֹ חָזְקָה לְהָזִיד, הוּרַד מִכִּסֵּא מַלְכוּתוֹ וִיקָרוֹ הֶעֱבִירוּ מִמֶּנּוּ. (כא) וּמִן בְּנֵי אָדָם גֹּרַשׁ, וְלִבּוֹ עִם הַחַיָּה שִׁוָּה, וְעִם עֲרוֹדִים מוֹשָׁבוֹ, עֵשֶׂב  כִּשְׁוָרִים יַאֲכִילוּהוּ, וּמִטַּל הַשָּׂמִים גּוּפוֹ יֵרָטֵב, עַד אֲשֶׁר יָדַע כִּי שׁוֹלֵט הָאֵל הָעֶלְיוֹן בְּמַלְכוּת אֱנוֹשׁ, וְאֶת אֲשֶׁר יַחְפֹץ יָקִים עָלֶיהָ.

(כב) וְאַתָּה בְּנוֹ בֵּלְשַׁאצַּר לֹא הִשְׁפַּלְתָּ לְבָבְךָ יַעַן אֲשֶׁר כָּל זֶה יָדַעְתָּ. (כג) וְעַל אֲדוֹנֵי הַשָּׁמַיִם הִתְרוֹמַמְתָּ, וְאֶת כְּלֵי בֵּיתוֹ הֵבִיאוּ לְפָנֶיךָ, וְאַתָּה וְשָׂרֶיךָ נָשֶׁיךָ וּפִילַגְשֶׁיךָ יַיִן שָׁתוּ בָּהֶם, וְלֵאלֹהֵי כֶסֶף וְזָהָב, נְחֹשֶׁת בַּרְזֶל עֵץ וָאֶבֶן, אֲשֶׁר לֹא יִרְאוּ וְלֹא יִשְׁמְעוּ וְלֹא יֵדְעוּ שִׁבַּחְתָּ, וְאֶת הָאֱלֹהִים אֲשֶׁר נִשְׁמָתְךָ בְיָדוֹ וְכָל דְּרָכֶיךָ לוֹ לֹא פֵאַרְתָּ. (כד) אָז  מִלְּפָנָיו נִשְׁלַח פַּס הַיָּד, וְזֶה הַכְּתָב אֲשֶׁר נִרְשָׁם.

(כה) וְזֶה הַכְּתָב אֲשֶׁר נִרְשָׁם: מְנֵה מְנֵה תְּקֵל וּפַרְסִין. (כו) זֶה פִּתְרוֹן הַדָּבָר: מְנֵה, מָנָה אֱלֹהִים מַלְכוּתְךָ וְהִשְׁלִימָהּ.(כז) תְּקֵל, נִשְׁקַלְתָּ בְּמֹאזְנַיִם וְנִמְצֵאתָ חָסֵר. (כח) פְּרֵס, נִפְרְסָה מַלְכוּתְךָ וְנִתְּנָה לְמָדַי וּפָרָס.

(כט) אָז אָמַר בֵּלְשַׁאצַּר, וְהִלְבִּישׁוּ אֶת דָּנִיֵּאל אַרְגָּמָן וּרְבִיד הַזָּהָב עַל צַוָּארוֹ, וַיַּכְרִיזוּ עָלָיו כִּי יִהְיֶה שׁוֹלֵט שְׁלִישִׁי בַּמַּלְכוּת. (ל) בּוֹ בַלַּיְלָה הוּמַת בֵּלְשַׁאצַּר הַמֶּלֶךְ הַכַּשְׂדִּי.

דניאל ו

(א) וְדָרְיָוֶשׁ הַמָּדִי קִבֵּל אֶת הַמַּלְכוּת כְּבֶן שִׁשִּׁים וּשְׁתַּיִם שָׁנָה. (ב) וַיִּיטַב בְּעֵינֵי דָרְיָוֶשׁ, וְהֵקִים עַל הַמַּלְכוּת אֶת הָאֲחַשְׁדַּרְפְּנִים מֵאָה וְעֶשְׂרִים, אֲשֶׁר יִהְיוּ בְּכָל הַמַּלְכוּת. (ג) וּלְמַעְלָה מֵהֶם וְזִירִים שְׁלֹשָׁה אֲשֶׁר דָּנִיֵּאל אֶחָד מֵהֶם,  אֲשֶׁר יִהְיוּ הָאֲחַשְׁדַּרְפְּנִים הָאֵלֶּה נוֹתְנִים לָהֶם עֵצָה, וְהַמֶּלֶךְ לֹא יִהְיֶה נִזָּק.

(ד) אָז דָּנִיֵּאל הַזֶּה הָיָה מְנַצֵּח עַל הַוְּזִירִים וְהָאֲחַשְׁדַּרְפְּנִים יַעַן אֲשֶׁר רוּחַ יְתֵרָה בּוֹ, וְהַמֶּלֶךְ חָשַׁב לַהֲקִימוֹ עַל כָּל הַמַּלְכוּת. (ה) אָז הַוְּזִירִים וְהָאֲחַשְׁדַּרְפְּנִים הָיוּ מְבַקְּשִׁים עֲלִילָה לִמְצֹא לְדָנִיֵּאל מִצַּד הַמַּלְכוּת, וְכָל עֲלִילָה וּמָשְׁחָת לֹא יָכְלוּ לִמְצֹא בַּעֲבוּר אֲשֶׁר נֶאֱמָן הוּא, וְכָל מִשְׁגֶּה וּמָשְׁחָת לֹא נִמְצָא אֶצְלוֹ. (ו) אָז אָמְרוּ הָאֲנָשִׁים הָאֵלֶּה כִּי  לֹא נִמְצָא לְדָנִיֵּאל הַזֶּה כָּל עֲלִילָה, אַךְ מָצָאנוּ אֶצְלוֹ בְּדָת אֱלֹהָיו.

{ס} (ז) אָז הַוְּזִירִים וְהָאֲחַשְׁדַּרְפְּנִים הָאֵלֶּה רָגְשׁוּ עַל הַמֶּלֶךְ, וְכֵן אָמְרוּ לוֹ: דָּרְיָוֶשׁ הַמֶּלֶךְ לְעוֹלָמִים חֱיֵה! (ח) הִתְיָעֲצוּ כָּל וְזִירֵי הַמַּלְכוּת, הַסְּגָנִים וְהָאֲחַשְׁדַּרְפְּנִים, הַיּוֹעֲצִים וְהַפַּחוֹת, (עַל) הַמֶּלֶךְ לְהָקִים חֹק וּלְחַזֵּק אִסָּר, כִּי כָל אֲשֶׁר יְבַקֵּשׁ בַּקָּשָׁה מִן כָּל אֱלוֹהַּ וְאָדָם עַד יָמִים שְׁלשִׁים חוּץ מִמְּךָ הַמֶּלֶךְ, יָשְׂלַךְ לְגֹב הָאֲרָיוֹת. (ט) עַתָּה הַמֶּלֶךְ תָּקִים אֶת הָאִסָּר וְתִרְשֹׁם אֶת הַכְּתָב שֶׁלֹּא לְשַׁנּוֹת, כְּדָת מָדַי וּפָרַס אֲשֶׁר לֹא תַעֲבֹר. (י) עַל כֵּן הַמֶּלֶךְ דָּרְיָוֶשׁ רָשַׁם הַכְּתָב וְהָאִסָּר. (יא) וְדָנִיֵּאל כַּאֲשֶׁר יָדַע כִּי נִרְשַׁם הַכְּתָב נִכְנַס לְבֵיתוֹ, וְחַלּוֹנוֹת פְּתוּחִים לוֹ בַּעֲלִיָּתוֹ  נֶגֶד יְרוּשָׁלַיִם, וּזְמַנִּים שְׁלשָׁה בַּיּוֹם הוּא כוֹרֵעַ עַל בִּרְכָּיו, וּמִתְפַּלֵּל וּמוֹדֶה לִפְנֵי אֱלֹהָיו, כַּאֲשֶׁר הָיָה עוֹשֶׂה מִלִּפְנֵי זֶה.

{ס} (יב) אָז הָאֲנָשִׁים הָאֵלֶּה רָגְשׁוּ וּמָצְאוּ אֶת דָּנִיֵּאל מְבַקֵּשׁ וּמִתְחַנֵּן לִפְנֵי אֱלֹהָיו. (יג) אָז נִגְּשׁוּ וַיֹּאמְרוּ לִפְנֵי הַמֶּלֶךְ  עַל אִסַּר הַמֶּלֶךְ: הֲלֹא אִסָּר רָשַׁמְתָּ, אֲשֶׁר כָּל אִישׁ אֲשֶׁר יְבַקֵּשׁ מִכָּל אֱלוֹהַּ וְאָדָם עַד יָמִים שְׁלשִׁים חוּץ מִמְּךָ הַמֶּלֶךְ, יָשְׁלָךְ לְגֹב הָאֲרָיוֹת! וַיַּעַן הַמֶּלֶךְ וַיֹּאמַר: נָכוֹן הַדָּבָר כְּדָת מָדַי וּפָרַס אֲשֶׁר לֹא יַעֲבֹר. (יד) אָז עָנוּ וְאָמְרוּ  לִפְנֵי הַמֶּלֶךְ כִּי דָנִיֵּאל אֲשֶׁר מִבְּנֵי גָּלוּת יְהוּדָה לֹא שָׂם עָלֶיךָ הַמֶּלֶךְ לֵב וְעַל הָאִסָּר אֲשֶׁר רָשַׁמְתָּ, וּזְמַנִּים שְׁלשָׁה בַּיּוֹם מְבַקֵּשׁ בַּקָּשָׁתוֹ.

{פ} (טו) אָז הַמֶּלֶךְ כַּאֲשֶׁר אֶת הַדָּבָר שָׁמַע וַיֵּרַע לוֹ מְאֹד, וַיָּשֶׁם אֶת לִבּוֹ עַל דָּנִיֵּאל לְהַצִּילוֹ, וְעַד בּוֹא הַשֶּׁמֶשׁ הָיָה מִתְאַמֵּץ לְהַצִּילוֹ. {ס} (טז) אָז הָאֲנָשִׁים הָאֵלֶּה רָגְשׁוּ עַל הַמֶּלֶךְ, וַיֹּאמְרוּ לַמֶּלֶךְ: דַּע הַמֶּלֶךְ כִּי דָת לְמָדַי וּפָרַס, כִּי כָּל אִסָּר וְחֹק אֲשֶׁר הַמֶּלֶךְ יָקִים אֵין לְשַׁנּוֹת. (יז) אָז הַמֶּלֶךְ אָמַר וַיָּבִיאוּ אֶת דָּנִיֵּאל, וַיַּשְׁלִיכוּהוּ לְגֹב הָאֲרָיוֹת. וַיַּעַן הַמֶּלֶךְ וַיֹּאמֶר לְדָנִיֵּאל: אֱלֹהֶיךָ אֲשֶׁר אַתָּה עוֹבֵד אוֹתוֹ תָּמִיד הוּא יַצִּילֶךָ! (יח) וַתּוּבָא אֶבֶן אַחַת וַתּוּשָׂם עַל פִּי הַגֹּב, וַיַּחְתְּמֶהָ הַמֶּלֶךְ בְּטַבַּעְתּוֹ וּבְטַבַּעַת שָׂרָיו, אֲשֶׁר לֹא יְשַׁנֶּה דָּבָר בְּדָנִיֵּאל. (יט) אָז הָלַךְ הַמֶּלֶךְ לְהֵיכָלוֹ וַיָּלֶן בְּצוֹם,  וְסַמִּים לֹא הֵבִיא לְפָנָיו, וּשְׁנָתוֹ נָדְדָה עָלָיו.

(כ) אָז הַמֶּלֶךְ עִם שַׁחַר יָקוּם בַּבֹּקֶר, וּבְחִפָּזוֹן אֶל גֹּב הָאֲרָיוֹת הָלַךְ. (כא) וּבְקָרְבוֹ לַגֹּב אֶל דָּנִיֵּאל בְּקוֹל עָצוּב זָעַק, וַיַּעַן הַמֶּלֶךְ וַיֹּאמֶר לְדָנִיֵּאל: דָּנִיֵּאל עֶבֶד אֵל חַי! אֱלֹהֶיךָ אֲשֶׁר אַתָּה עוֹבֵד אוֹתוֹ תָּמִיד, הֲיָכוֹל לְהַצִּילְךָ מִן הָאֲרָיוֹת?(כב) אָז דָּנִיֵּאל עִם הַמֶּלֶךְ דִּבֵּר: הַמֶּלֶךְ לְעוֹלָמִים חֱיֵה! (כג) אֱלֹהַי שָׁלַח מַלְאָכוֹ וַיִּסְגֹר אֶת פִּי הָאֲרָיוֹת וְלֹא חִבְּלוּנִי, עַל אֲשֶׁר נִמְצְאָה לִי לְפָנָיו זְכוּת, וְאַף לְפָנֶיךָ הַמֶּלֶךְ חִבּוּל לֹא עָשִׂיתִי.

(כד) אָז הַמֶּלֶךְ מְאֹד טוֹב עָלָיו, וַיֹּאמֶר לְהַעֲלוֹת אֶת דָּנִיֵּאל מִן הַגֹּב, וְהָעֳלָה דָנִיֵּאל מִן הַגֹּב וְכָל חַבָּלָה לֹא נִמְצְאָה בוֹ, כִּי הֶאֱמִין בֵּאלֹהָיו. (כה) וַיֹּאמֶר הַמֶלֶךְ וַיָּבִיאוּ אֶת הָאֲנָשִׁים הָאֵלֶּה אֲשֶׁר הִלְשִׁינוּ עַל דָּנִיֵּאל, וַיַּשְׁלִיכוּ לְגֹב  הָאֲרָיוֹת אוֹתָם אֶת בְּנֵיהֶם וּנְשֵׁיהֶם, וְלֹא הִגִּיעוּ לְקַרְקֵעַ הַגֹּב עַד אֲשֶׁר שָׁלְטוּ בָהֶם הָאֲרָיוֹת, וְאֶת כָּל עַצְמוֹתֵיהֶם הֵדֵקּוּ.

(כו) אָז דָּרְיָוֶשׁ הַמֶּלֶךְ כָּתַב לְכָל הָעַמִּים הָאֻמּוֹת וְהַלְּשׁוֹנוֹת הַיּוֹשְׁבִים בְּכָל הָאָרֶץ: שְׁלוֹמְכֶם יִרְבֶּה! (כז) מִלְּפָנַי הוּשַׂם צַו כִּי בְּכָל שִׁלְטוֹן מַלְכוּתִי יִהְיוּ חֲרֵדִים וִירֵאִים מִלִּפְנֵי אֱלֹהָיו שֶׁל דָּנִיֵּאל, כִּי הוּא אֵל חַי וְקַיָּם לְעוֹלָמִים, וּמַלְכוּתוֹ לֹא תִּשָּׁחֵת, וְשִׁלְטוֹנוֹ עַד הַסּוֹף. (כח) מוֹשִׁיעַ וּמַצִּיל, וְעוֹשֶׂה אוֹתוֹת וְנִפְלָאוֹת בַּשָּׁמַיִם וּבָאָרֶץ, אֲשֶׁר הִצִּיל  אֶת דָּנִיֵּאל מִיַּד הָאֲרָיוֹת.

(כט) וְדָנִיֵּאל הַזֶּה הִצְלִיחַ בְּמַלְכוּת דָּרְיָוֶשׁ וּבְמַלְכוּת כּוֹרֶשׁ הַפַּרְסִי.

קריאה לפסח (רשות): שיר השירים א

שִׁיר הַשִּׁירִים אֲשֶׁר לִשְׁלֹמֹה׃ 2 יִשָּׁקֵנִי מִנְּשִׁיקוֹת פִּיהוּ, כִּי־טוֹבִים דֹּדֶיךָ מִיָּיִן׃ 3 לְרֵיחַ שְׁמָנֶיךָ טוֹבִים, שֶׁמֶן תּוּרַק שְׁמֶךָ; עַל־כֵּן עֲלָמוֹת אֲהֵבוּךָ׃ 4 מָשְׁכֵנִי אַחֲרֶיךָ נָּרוּצָה; הֱבִיאַנִי הַמֶּלֶךְ חֲדָרָיו, נָגִילָה וְנִשְׂמְחָה בָּךְ, נַזְכִּירָה דֹדֶיךָ מִיַּיִן, מֵישָׁרִים אֲהֵבוּךָ׃    ס    5 שְׁחוֹרָה אֲנִי וְנָאוָה, בְּנוֹת יְרוּשָׁלִָם; כְּאָהֳלֵי קֵדָר, כִּירִיעוֹת שְׁלֹמֹה׃ 6 אַל־תִּרְאוּנִי שֶׁאֲנִי שְׁחַרְחֹרֶת, שֶׁשֱּׁזָפַתְנִי הַשָּׁמֶשׁ; בְּנֵי אִמִּי נִחֲרוּ־בִי, שָׂמֻנִי נֹטֵרָה אֶת־הַכְּרָמִים, כַּרְמִי שֶׁלִּי לֹא נָטָרְתִּי׃ 7 הַגִּידָה לִּי, שֶׁאָהֲבָה נַפְשִׁי, אֵיכָה תִרְעֶה, אֵיכָה תַּרְבִּיץ בַּצָּהֳרָיִם; שַׁלָּמָה אֶהְיֶה כְּעֹטְיָה, עַל עֶדְרֵי חֲבֵרֶיךָ׃ 8 אִם־לֹא תֵדְעִי לָךְ, הַיָּפָה בַּנָּשִׁים; צְאִי־לָךְ בְּעִקְבֵי הַצֹּאן, וּרְעִי אֶת־גְּדִיֹּתַיִךְ, עַל מִשְׁכְּנוֹת הָרֹעִים׃    ס    9 לְסֻסָתִי בְּרִכְבֵי פַרְעֹה, דִּמִּיתִיךְ רַעְיָתִי׃ 10 נָאווּ לְחָיַיִךְ בַּתֹּרִים, צַוָּארֵךְ בַּחֲרוּזִים׃ 11 תּוֹרֵי זָהָב נַעֲשֶׂה־לָּךְ, עִם נְקֻדּוֹת הַכָּסֶף׃ 12 עַד־שֶׁהַמֶּלֶךְ בִּמְסִבּוֹ, נִרְדִּי נָתַן רֵיחוֹ׃ 13 צְרוֹר הַמֹּר דּוֹדִי לִי, בֵּין שָׁדַי יָלִין׃ 14 אֶשְׁכֹּל הַכֹּפֶר דּוֹדִי לִי, בְּכַרְמֵי עֵין גֶּדִי׃    ס    15 הִנָּךְ יָפָה רַעְיָתִי, הִנָּךְ יָפָה עֵינַיִךְ יוֹנִים׃ 16 הִנְּךָ יָפֶה דוֹדִי אַף נָעִים, אַף־עַרְשֵׂנוּ רַעֲנָנָה׃ 17 קֹרוֹת בָּתֵּינוּ אֲרָזִים, רַחִיטֵנוּ (רַהִיטֵנוּ) בְּרוֹתִים׃

שיר השירים ב

אֲנִי חֲבַצֶּלֶת הַשָּׁרוֹן, שׁוֹשַׁנַּת הָעֲמָקִים׃ 2 כְּשׁוֹשַׁנָּה בֵּין הַחוֹחִים, כֵּן רַעְיָתִי בֵּין הַבָּנוֹת׃ 3 כְּתַפּוּחַ בַּעֲצֵי הַיַּעַר, כֵּן דּוֹדִי בֵּין הַבָּנִים; בְּצִלּוֹ חִמַּדְתִּי וְיָשַׁבְתִּי, וּפִרְיוֹ מָתוֹק לְחִכִּי׃ 4 הֱבִיאַנִי אֶל־בֵּית הַיָּיִן, וְדִגְלוֹ עָלַי אַהֲבָה׃ 5 סַמְּכוּנִי בָּאֲשִׁישׁוֹת, רַפְּדוּנִי בַּתַּפּוּחִים; כִּי־חוֹלַת אַהֲבָה אָנִי׃ 6 שְׂמֹאלוֹ תַּחַת לְרֹאשִׁי, וִימִינוֹ תְּחַבְּקֵנִי׃ 7 הִשְׁבַּעְתִּי אֶתְכֶם בְּנוֹת יְרוּשָׁלִַם בִּצְבָאוֹת, אוֹ בְּאַיְלוֹת הַשָּׂדֶה; אִם־תָּעִירוּ וְאִם־תְּעוֹרְרוּ אֶת־הָאַהֲבָה עַד שֶׁתֶּחְפָּץ׃    ס    8 קוֹל דּוֹדִי, הִנֵּה־זֶה בָּא; מְדַלֵּג עַל־הֶהָרִים, מְקַפֵּץ עַל־הַגְּבָעוֹת׃ 9 דּוֹמֶה דוֹדִי לִצְבִי, אוֹ לְעֹפֶר הָאַיָּלִים; הִנֵּה־זֶה עוֹמֵד אַחַר כָּתְלֵנוּ, מַשְׁגִּיחַ מִן־הַחֲלֹּנוֹת, מֵצִיץ מִן־הַחֲרַכִּים׃ 10 עָנָה דוֹדִי וְאָמַר לִי; קוּמִי לָךְ רַעְיָתִי יָפָתִי וּלְכִי־לָךְ׃ 11 כִּי־הִנֵּה הַסְּתוֹ (הַסְּתָיו) עָבָר; הַגֶּשֶׁם חָלַף הָלַךְ לוֹ׃ 12 הַנִּצָּנִים נִרְאוּ בָאָרֶץ, עֵת הַזָּמִיר הִגִּיעַ; וְקוֹל הַתּוֹר נִשְׁמַע בְּאַרְצֵנוּ׃ 13 הַתְּאֵנָה חָנְטָה פַגֶּיהָ, וְהַגְּפָנִים סְמָדַר נָתְנוּ רֵיחַ; קוּמִי לְכִי (לָךְ) רַעְיָתִי יָפָתִי וּלְכִי־לָךְ׃    ס    14 יוֹנָתִי בְּחַגְוֵי הַסֶּלַע, בְּסֵתֶר הַמַּדְרֵגָה, הַרְאִינִי אֶת־מַרְאַיִךְ, הַשְׁמִיעִינִי אֶת־קוֹלֵךְ; כִּי־קוֹלֵךְ עָרֵב וּמַרְאֵיךְ נָאוֶה׃    ס    15 אֶחֱזוּ־לָנוּ שׁוּעָלִים, שׁוּעָלִים קְטַנִּים מְחַבְּלִים כְּרָמִים; וּכְרָמֵינוּ סְמָדַר׃ 16 דּוֹדִי לִי וַאֲנִי לוֹ, הָרֹעֶה בַּשּׁוֹשַׁנִּים׃ 17 עַד שֶׁיָּפוּחַ הַיּוֹם, וְנָסוּ הַצְּלָלִים; סֹב דְּמֵה־לְךָ דוֹדִי לִצְבִי, אוֹ לְעֹפֶר הָאַיָּלִים עַל־הָרֵי בָתֶר׃    ס

שיר השירים ג

עַל־מִשְׁכָּבִי בַּלֵּילוֹת, בִּקַּשְׁתִּי אֵת שֶׁאָהֲבָה נַפְשִׁי; בִּקַּשְׁתִּיו וְלֹא מְצָאתִיו׃ 2 אָקוּמָה נָּא וַאֲסוֹבְבָה בָעִיר, בַּשְּׁוָקִים וּבָרְחֹבוֹת, אֲבַקְשָׁה אֵת שֶׁאָהֲבָה נַפְשִׁי; בִּקַּשְׁתִּיו וְלֹא מְצָאתִיו׃ 3 מְצָאוּנִי הַשֹּׁמְרִים, הַסֹּבְבִים בָּעִיר; אֵת שֶׁאָהֲבָה נַפְשִׁי רְאִיתֶם׃ 4 כִּמְעַט שֶׁעָבַרְתִּי מֵהֶם, עַד שֶׁמָּצָאתִי, אֵת שֶׁאָהֲבָה נַפְשִׁי; אֲחַזְתִּיו וְלֹא אַרְפֶּנּוּ, עַד־שֶׁהֲבֵיאתִיו אֶל־בֵּית אִמִּי, וְאֶל־חֶדֶר הוֹרָתִי׃ 5 הִשְׁבַּעְתִּי אֶתְכֶם בְּנוֹת יְרוּשָׁלִַם בִּצְבָאוֹת, אוֹ בְּאַיְלוֹת הַשָּׂדֶה; אִם־תָּעִירוּ וְאִם־תְּעוֹרְרוּ אֶת־הָאַהֲבָה עַד שֶׁתֶּחְפָּץ׃    ס    6 מִי זֹאת, עֹלָה מִן־הַמִּדְבָּר, כְּתִימֲרוֹת עָשָׁן; מְקֻטֶּרֶת מוֹר וּלְבוֹנָה, מִכֹּל אַבְקַת רוֹכֵל׃ 7 הִנֵּה, מִטָּתוֹ שֶׁלִּשְׁלֹמֹה, שִׁשִּׁים גִּבֹּרִים סָבִיב לָהּ; מִגִּבֹּרֵי יִשְׂרָאֵל׃ 8 כֻּלָּם אֲחֻזֵי חֶרֶב, מְלֻמְּדֵי מִלְחָמָה; אִישׁ חַרְבּוֹ עַל־יְרֵכוֹ, מִפַּחַד בַּלֵּילוֹת׃    ס    9 אַפִּרְיוֹן, עָשָׂה לוֹ הַמֶּלֶךְ שְׁלֹמֹה, מֵעֲצֵי הַלְּבָנוֹן׃ 10 עַמּוּדָיו עָשָׂה כֶסֶף, רְפִידָתוֹ זָהָב, מֶרְכָּבוֹ אַרְגָּמָן; תּוֹכוֹ רָצוּף אַהֲבָה, מִבְּנוֹת יְרוּשָׁלִָם׃ 11 צְאֶינָה וּרְאֶינָה בְּנוֹת צִיּוֹן בַּמֶּלֶךְ שְׁלֹמֹה; בָּעֲטָרָה, שֶׁעִטְּרָה־לּוֹ אִמּוֹ בְּיוֹם חֲתֻנָּתוֹ, וּבְיוֹם שִׂמְחַת לִבּוֹ׃    ס